தமிழ்த்திரையுலகில் லேடி சூப்பர் ஸ்டார் என செல்லமாக அழைக்கப்படும் நடிகை நயன்தாரா, தற்போது மூக்குத்தி அம்மன் திரைப்படத்தில் நடித்து வருகின்றார்.
கொரோனா பாதிப்புக்கள் காரணமாக பல திரைப்படங்கள் இன்னும் வெளிவராமல் உள்ளன. எனினும் சில திரைப்படங்கள் இணையத்தில் வெளிவந்திருந்தன.
மக்கள் செல்வன் விஜய் சேதுபதியின் க.பெ.ரணசிங்கம், ஜோதிகாவின் பொன்மகள் வந்தாள், அனுஷ்காவின் சைலென்ஸ், கீர்த்தி சுரேசின் பெண்குயின், வரலட்சுமி நடித்துள்ள டேனி உள்ளிட்ட பல படங்கள் இணையத்தில் ஏற்கனவே வெளிவந்திருந்தன. அத்துடன் நடிகர் சூர்யாவின் ''சூரரைப் போற்று'' எதிர்வரும் 30 ஆம் திகதி இணையத்தில் வெளியாகும் என எதிர்பார்க்கப்படுகின்றது.
இதனிடையே தீபாவளி பண்டிகையில் விஷாலின் சக்ரா, சிவகார்த்திகேயன் நடித்துள்ள டாக்டர் உள்ளிட்ட சில படங்களும் இணையத்தில் வெளியாகும் என, செய்திகள் வெளிவந்துள்ளன.
இந்த நிலையில் நடிகை நயன்தாராவின் ''மூக்குத்தி அம்மன்'' திரைப்படமும் தீபாவளிக்கு வெளியாகும் என எதிர்பார்க்கப்படுகின்றது. இது குறித்து மூக்குத்தி அம்மன் படக்குழு ஆராய்ந்து வருவதாகவும், வெகு விரைவில் திகதி அறிவிக்கப்படும் எனவும் தெரிவிக்கப்பட்டுள்ளது.
நயத்தாராவின் படத்தைக் காண்பதற்காக தற்போது அவரது ரசிகர்கள் மிகுந்த ஆர்வத்துடன் இருப்பதாக தெரிய வருகின்றது.