82 Views
ஆறு நாட்கள் நீடித்த போரின் இறுதியில் சூரபத்மன் மாமரமாக உருமாறி நின்றபோது, முருகப்பெருமான் தனது வேலினால் அம்மரத்தை இரண்டாகப் பிளந்தார். இதன்போது ஒரு பகுதி மயிலாகவும், மற்றைய பகுதி சேவலாகவும் மாறியதாக ஐதீகம் கூறுகின்றது. இதனை நினைவுகூரும் வகையில் கந்த சஷ்டி விரதத்தின் ஆறாம் நாளான இன்று, இலங்கையின் பல முருகன் ஆலயம் ஆலயங்களில் சூரசம்ஹார நிகழ்வுகள் பக்தி பூர்வமாக இடம்பெறுகின்றன.
தீமையை அழித்து நன்மையை நிலைநாட்டும் தத்துவத்தை எடுத்துரைக்கும் இத்திருவிழா, மனிதர்களிடையே காணப்படும் ஆணவம், அகங்காரம் மற்றும் தீய எண்ணங்களை அழித்து நல்வழியில் பயணிக்க வேண்டும் என்பதையும் உணர்த்துகின்றது. இதனால் நாட்டின் பல பாகங்களிலிருந்தும் பெருமளவான பக்தர்கள் ஆலயங்களுக்குச் சென்று முருகப்பெருமானை வழிபட்டு சூரசம்ஹாரத் திருவிழாவில் கலந்துகொள்கின்றனர்.