இயற்கை ஆர்வலர்கள் காடுகள், பூங்காக்கள், நீர்நிலைகளுக்குச் சென்று அங்கிருக்கும் பல்வேறு பறவைகளை அடையாளம் காண முயல்கிறார்கள். ஆனால் அவற்றின் பெயர்களையும் இனங்களையும் கண்டறிவது அவ்வளவு எளிதான விடயமல்ல. இதற்கு உதவும் விதமாக வடிவமைக்கப்பட்டுள்ள இலவசச் செயலிதான் Merlin Bird ID.
அமெரிக்காவின் Cornell பல்கலைக்கழகத்தைச் சேர்ந்த Cornell Lab of Ornithology உருவாகியுள்ள இந்தச் செயலி, இயந்திரக் கற்றல், கணினிப் பார்வை, ஒலிப் பகுப்பாய்வு ஆகியவற்றுடன் பறவைக் கண்காணிப்புத் தரவுகளையும் ஒன்றிணைத்துச் செயல்படுகிறது. பறவைகள் மரக்கிளைகளுக்குள் மறைந்திருந்தாலும் அவற்றின் கீச்சொலியை Microphone மூலம் பதிவு செய்யலாம்.
பறவையின் புகைப்படத்தைச் செயலியில் பதிவேற்றினால், கணினிப் பார்வைத் தொழில்நுட்பம் அதன் உடல் வடிவம், இறகுகளின் நிறம், தோற்ற அமைப்பு ஆகியவற்றைப் பகுப்பாய்வு செய்து பொருந்தக்கூடிய பறவை இனங்களைப் பரிந்துரைக்கிறது. இதனால் பறவைகளைப் பற்றிய முன் அனுபவம் இல்லாதவர்களும் அவற்றை எளிதாக அறிந்துகொள்ள முடியும்.
பறவை ஆராய்ச்சியாளர்கள், வனவிலங்கு புகைப்படக் கலைஞர்கள், சூழலியல் மாணவர்கள், இயற்கை ஆர்வலர்கள், குழந்தைகளுக்குப் பறவைகளை அறிமுகப்படுத்த விரும்பும் பெற்றோர் இதைப் பயன்படுத்தலாம். செய்யறிவையும் பறவையியலையும் இணைக்கும் Merlin Bird ID, பல்லுயிர்ப் பாதுகாப்பு குறித்த விழிப்புணர்வை பொதுமக்களிடையே வளர்க்கப் பெரிதும் உதவுகிறது.