ஹிந்தியில் அமீர்கான் நடித்து வெளியாகி சர்ச்சைகளையும் கிளப்பி, எக்கச்சக்க வசூலையும் குவித்த படம் பிகே. இந்தப் படத்தை தமிழில் கொண்டு வருவதற்காய் அதன் தமிழ் உரிமையை வாங்கியது நம்ம ஜெமினி கலர் லேப் நிறுவனம். வாங்கிய நிறுவனம் யாரை வைத்து படத்தை ஆரம்பிக்கலாமென திட்டம் தீட்டி வந்தது.

பலரும் தமது அறிவுக்கு எட்டிய ஆருடங்களை கூறி வந்தார்கள். கதையில் சில மாற்றங்களை மேற்கொண்டால் கமல் நடிக்க வாய்ப்புண்டு என பலர் கூறி வந்தார்கள். ஆனாலும், கமல் தரப்பிலிருந்து எந்தப் பதிலும் வரவில்லை.

இந்நிலையில், ஜெமினி கலர் லேப் நிறுவனம் 3 இயக்குனர்களிடம், கமலை நாயகனாக வைத்து படத்தை இயக்க சம்மதமா என்று கோரியதாகவும், மூவருமே சம்மதம் சொன்னதாகவும், அதில் யாருக்கு இந்த படத்தை இயக்கம் அதிஷ்டம் வாய்க்கப் போகிறது என காத்திருக்கிறது ஒட்டுமொத்த கோடம்பாக்கமும்!

இந்த விவகாரம் இப்படி இருக்க, இப்பொழுது இன்னொரு கதையும் கசிந்து வந்திருக்கிறது. பிகே படத்தின் ஹிந்திப் பதிப்பில், சஞ்சய் தத் நடித்த பாத்திரத்தில், சூப்பர் ஸ்டார் ரஜினியை நடிக்க வைக்க ஏற்பாடுகள் மேற்கொள்ளப்பட்டு வருகிறதாம்.

ரஜினி நடிப்பாரா இல்லையா என்பது குறித்து அவரது தரப்பும் இன்னும் வாய் திறக்கவில்லை. அத்தோடு, இந்தப்படத்தில் எப்படியும் ரஜினி கமல் இணைவார்கள் என, திரையுலக தீர்க்கதரிசிகள் கூறிவருகின்றனர். பார்க்கலாம் ! இணைந்தால் நமக்கும் மகிழ்ச்சிதான் !!

-கொண்டுவந்தது கோடம்பாக்கக் குருவி-