சும்மாவே மோதிக் கொள்கிற அஜித் - விஜய் ரசிகர்களை மேலும் கலவரப்படுத்தும் செய்தியா என்று திகைக்காமல் மேலும் வாசியுங்கள்.

'தல' அஜித் நடிக்கும் புதிய படம் பற்றி நாள்தோறும் புதிது புதிதாய் செய்திகள் வந்துகொண்டே இருக்கின்றன.

ஏ.எம்.ரத்னம் தயாரிப்பில் கௌதம் மேனன் இயக்கத்தில் அஜித் இரட்டை வேடங்களில் நடிக்கும் படத்திற்கு இன்னமும் பெயர் வைக்கப்படவில்லை. 

இப்படத்தில் அனுஷ்கா, த்ரிஷா ஆகியோர் நாயகிகளாக நடிக்கிறார்கள் என்று தகவல்கள் வந்திருந்தன.

மேலும் முக்கிய கதாபாத்திரம் ஒன்றில் நடிக்க நடிகர் அருண் விஜய் ஒப்பந்தம் செய்யப்பட்டிருக்கிறார். 

இப்படத்தில் அருண் விஜய்க்கு என்ன பாத்திரம் என இத்தனை நாட்களாக சஸ்பென்ஸ் நிலவி வந்தது. 

ஒருவேளை ஆரம்பம் ஆர்யா போல துணை பாத்திரம் ஏதாவதோ என ஊகங்களும் நிலவியிருந்தன.

இந்நிலையில் சனிக்கிழமை நடைபெற்ற தமிழகத்தின் தனியார் தொலைக்காட்சியொன்றின் திரைப்பட விருது விழாவில், ‘ஆரம்பம்’ படத்திற்காக விருது வாங்க மேடையேறிய தயாரிப்பாளர் ஏ.எம்.ரத்னம் அந்த சஸ்பென்ஸை உடைத்தார்.

 ‘‘அஜித்துடன் இரண்டு படம் செய்கிறோம். ஏற்கெனவே ஒருமுறை கௌதம் மேனனுடன் நான் படம் செய்வதாக இருந்தது. ஆனால், அது இப்போதுதான் கைகூடியிருக்கிறது. அனுஷ்கா, த்ரிஷா நாயகிகளாக நடிக்கிறார்கள். அருண் விஜய் வில்லனாக நடிக்கிறார். இன்னும் இப்படத்திற்கு பெயர் வைக்கப்படவில்லை’’ என்று கூறினார் ஏ.எம்.ரத்னம்.