குளிர்சாதனப் பெட்டி உட்புறத்தில் குளிரை நேரடியாக உருவாக்குவதற்குப் பதிலாக, அங்குள்ள வெப்பத்தை உறிஞ்சி வெளியேற்றும் முறையில் செயற்படுகின்றது. மேலும் உட்புறத்திலிருந்து வெப்பத்தை உறிஞ்சிய பின்னர், பின்புறக் கம்பிகள் வழியாகச் சென்று அந்த வெப்பத்தை வெளிப்புறக் காற்றில் வெளியேற்றுகின்றது. பின்னர், குளிரூட்டியானது மீண்டும் சுழற்சியில் ஈடுபட்டு உட்புற வெப்பநிலையைக் குறைவாகப் பேண உதவுகின்றது. இந்தச் செயற்பாடு தொடர்ச்சியாக நடைபெறுவதன் மூலமே உணவுப் பொருட்கள் நீண்ட நேரம் பழுதடையாமல் பாதுகாக்கப்படுகின்றன.

இந்நிலையில், குளிர்சாதனப்பெட்டியின் பின்புறக் கம்பிகளில் அதிகளவு தூசுகள் படிவதும், குளிர்சாதனப் பெட்டியைச் சுவருடன் மிகவும் நெருக்கமாக வைப்பதும் வெப்பம் வெளியேறுவதைப் பாதிக்கக்கூடும் எனத் தெரிவிக்கப்படுகின்றது. இதனால், அதன் செயல்திறன் குறைவதுடன், மின்சாரப் பயன்பாடும் அதிகரிக்க வாய்ப்புள்ளது. எனவே, குளிர்சாதனப் பெட்டியின் பின்புறத்தை அவ்வப்போது சுத்தம் செய்வதுடன், சுவருக்கும் குளிர்சாதன பெட்டிக்கும் இடையில் உற்பத்தியாளர் பரிந்துரைக்கும் அளவில் இடைவெளியைப் பேணுவதும் அவசியமாகும்.