36 Views
விலங்குகளில் மிகவும் உயரமான ஒட்டகச்சிவிங்கிகள் பார்ப்பதற்கு அமைதியானவை போல் தோன்றினாலும், அவை இரவு நேரங்களில் மனிதர்களுக்கு எளிதில் கேட்காத முணுமுணுப்பு போன்ற ஒலிகளை எழுப்புகின்றன என ஆய்வுகள் தெரிவிக்கின்றன. மேலும், பெண் ஒட்டகச்சிவிங்கிகள் நின்றுகொண்டே குட்டிகளை ஈனுவதால், பிறக்கும் குட்டிகள் சுமார் ஐந்து அடி உயரத்திலிருந்து தரையில் விழுகின்றன. ஆச்சரியம் என்னவென்றால், பிறந்த சில மணி நேரங்களிலேயே எழுந்து நிற்கவும் நடக்கவும் அவை முயற்சிக்கின்றன.
ஒட்டகச்சிவிங்கிகளின் உடல் அமைப்பிலும் பல வியக்கத்தக்க இரகசியங்கள் உள்ளன. சுமார் 45 முதல் 50 சென்டிமீட்டர் நீளமுள்ள அவற்றின் நாக்கு அடர் நீலம் அல்லது ஊதா நிறத்தில் காணப்படுவதால் ,வெயிலிலிருந்து பாதுகாப்பு கிடைப்பதாகக் கருதப்படுகிறது. அதுமட்டுமன்றி, நீண்ட கழுத்தின் வழியாக மூளைக்குத் தேவையான இரத்தத்தைச் செலுத்துவதற்கு வலிமையான இதயம் உதவுகிறது. இதன் எடை சுமார் 11 கிலோகிராம் வரை இருக்கக்கூடும் என்பது குறிப்பிடத்தக்கது.
மனிதர்களைப் போல நீண்ட நேரம் உறங்காமல், ஒட்டகச்சிவிங்கிகள் ஒரு நாளில் குறுகிய நேரமே தூங்குகின்றன. அவற்றின் தூக்கம் சில நேரங்களில் நின்ற நிலையிலேயே நிகழ்கிறது. அமைதியாகத் தோன்றும் இந்த விலங்குகளின் வாழ்க்கைக்குள் இத்தனை ஆச்சரியங்கள் மறைந்திருப்பது இயற்கையின் அதிசயத்தையே எடுத்துக்காட்டுகிறது. உயரமான தோற்றம் முதல் வித்தியாசமான தூக்கப் பழக்கம் வரை, ஒட்டகச்சிவிங்கிகள் உலகின் வியப்பூட்டும் விலங்குகளில் ஒன்றாகத் திகழ்கின்றன.
Follow US
