சாதனை படைக்குமா சூப்பர்ஸ்டாரின் லிங்கா...?

தமிழ் சினிமாவின் வசூல்மன்னன் சூப்பர்ஸ்டார் ரஜினிகாந்த் தற்போது  நடித்துக்கொண்டிருக்கும் "லிங்கா" பற்றி வெளியாகும் செய்திகளுடன் வெளியீட்டு திகதியும் அறிவிக்கப்பட்டுள்ளதால் தினம் தினம் ரசிகர்களிடம் படம் பற்றிய எதிர்பார்ப்பு கூடுகின்ற நிலையில், வெளியீட்டு முன்பாகவே "லிங்கா"வின் வசூல்சாதனைகள் பற்றிய விசயங்களும் இதயத்துடிப்பை எகிறவைத்துக் கொண்டிருக்கிறது.

சூப்பர் ஸ்டார் ரஜினியுடன் நாயகிகளாக சோனாக்ஷி சின்ஹா, அனுஷ்கா இணைந்து நடிக்கும் இந்தப் படத்தில் சந்தானம் கொமெடியில் கொடிகட்டுகின்றாராம். இந்தப்படப்பிடிப்பு நிறைவடையவுள்ள நிலையில், இதன் வெளியீட்டு திகதியும் அறிவிக்கப்பட்டுள்ளது. ரஜினியின் பிறந்தநாளான டிசெம்பர் 12-ம் திகதி "லிங்கா" வெளியாகுமென உத்தியோகபூர்வமாக அறிவிக்கப்பட்டுள்ளது.

இந்தநிலையில் "லிங்கா"வின் வெளியீடு உட்பட அனைத்து உரிமைகளையும் வாங்கியுள்ள ஈரோஸ் நிறுவனம் படம்  வெளியாவதற்கு முன்பாகவே வெளிநாட்டு வெளியீட்டின் உரிமை, இந்திப்பதிப்புரிமை, செய்மதித்தொலைக்காட்சி உரிமை போன்றவற்றின் மூலமாக மட்டும் 200கோடி ரூபாவை வசூல் செய்யவுள்ளதாக செய்திகள் வெளியாகியுள்ளனவாம்.

இதைவிட தமிழ், தெலுங்கு மொழிகளில் "லிங்கா" வெளியாகவுள்ள திரையரங்கங்களின் வியாபாரத்திலும் அனல் பறப்பதாகவும் கோடம்பாக்கத் தகவல்கள் சொல்கின்றன. ரொக்லைன் வெங்கடேஷிடமிருந்து 165கோடி ரூபாவுக்கு ஈரோஸ் நிறுவனத்தால்  வாங்கங்கப்பட்ட "லிங்கா"வின் உரிமை இப்போதே 200கோடியை வசூல் செய்யும் நிலையில் உள்ளதும் பிரமிக்க வைக்கிறதாம்.

 இசைப்புயல் ஏ.ஆர்.ரஹ்மானின் இசையில் வெளியான இந்தப்படத்தின் பாடல்கள் "சூப்பர்ஹிட்" ஆகியுள்ள நிலையில், படம் வெளியானதன் பின்னர் வசூலில் எவ்வளவு சாதனை படைக்கப்போகின்றது என்ற எதிர்பார்ப்பையும் அதிர்வலைகளையும் தென்னிந்தியத் திரையுலகில் உண்டாக்கியுள்ளதாம் "லிங்கா".

இமயம் நாடும் நாயகனின் "லிங்கா" வசூலில் இமயத்தின் சிகரம் தொடுமா......? கேள்வியுடன் கோடம்பாக்கம்.

*கணேசமூர்த்தி ராகவன்.