நகத்தைச் சுற்றி திடீரென வீக்கம், சிவப்பு, கடுமையான வலி ஏற்பட்டால் அதை சாதாரணமாக எடுத்துக்கொள்ள வேண்டாம் என மருத்துவர்கள் எச்சரிக்கின்றனர். இது நகச்சுற்று (Paronychia) எனப்படும் தொற்றாக இருக்கலாம்.

ஆரம்ப நிலையிலேயே கவனித்தால், அதாவது வெதுவெதுப்பான நீரில் பாதிக்கப்பட்ட விரலை 15–20 நிமிடங்கள், தினமும் 3–4 முறை ஊறவைத்தால் வலி குறைவதோடு, சீழ் இயல்பாக வெளியேறவும் உதவலாம். அதேபோல் மஞ்சள், வேப்பிலை போன்ற இயற்கை கிருமி எதிர்ப்பு பண்புகள் கொண்ட பொருட்களைப் பயன்படுத்துவது சிலருக்கு நிவாரணம் தரலாம்.

சிறிய பழக்கவழக்கங்களே இந்தப் பிரச்சினையை மோசமாக்கும் என நிபுணர்கள் கூறுகின்றனர். நகங்களைக் கடிப்பது, நகத்தைச் சுற்றிய தோலைப் பிய்த்தெடுப்பது, அடிக்கடி கைகளை ஈரமாக வைத்திருப்பது போன்றவை தொற்று ஏற்படும் அபாயத்தை அதிகரிக்கின்றன. எனவே பாதிக்கப்பட்ட விரலை எப்போதும் சுத்தமாகவும் வறண்ட நிலையிலும் வைத்திருப்பதுடன், நகங்களை சரியான முறையில் வெட்டிப் பராமரிப்பதும் முக்கியம்.

ஆனால் வீக்கம் அதிகரித்து சீழ் கட்டுதல், தாங்க முடியாத வலி, காய்ச்சல் அல்லது சிவப்பு மற்ற பகுதிகளுக்கும் பரவுவது போன்ற அறிகுறிகள் தென்பட்டால் வீட்டு வைத்தியத்தில் மட்டும் நம்பிக்கை வைக்கக் கூடாது. அத்தகைய சூழலில் மருத்துவரை உடனடியாக அணுகி தேவையான சிகிச்சை அல்லது ஆன்டிபயாடிக் மருந்துகளைப் பெறுவது அவசியம். ஆரம்பத்திலேயே கவனம் செலுத்தினால், இந்தப் பிரச்சினையை எளிதாகக் கட்டுப்படுத்த முடியும் என சுகாதார நிபுணர்கள் அறிவுறுத்துகின்றனர்.